Tou posib dan lavi

Chacha ena 16 z-an, li viv apar, li res dan so kote; pena papa ek so mama travay maneve-mason, trime pou sirviv. Toultan linn gagn linpresion ki li pena so plas parmi lezot. Me kan finn ena enn esanz kiltirel ant ONG Caritas Solitude ek lasosiasion franse Les Apprentis d’Auteuil, tou inn sanze. Li’nn trouv enn kitzoz ki li pa ti atann : li’nn gagn koumadir enn deziem papa ek mama.

 

Depi mo tipti, mo al Caritas. Li koumadir mo deziem lakaz. Mo mama ti travay dan zardin potaze, aster-la li travay mason. Li pa fasil pou mwa trouv li fer enn travay zom. Mo pa konn mo papa. Mo’nn grandi san so prezans. Malgre mo ena zis 16 z-an, mo’nn aret lekol.

 

Kot Caritas, ler zot inn dir mwa ki nou pou pas enn moman avek bann zenn sorti Lafrans, mo pa ti santi mwa alez. Mo ti krwar zot pou get nou dan enn zar, parski zot blan, zot viv dan lux ek dan enn gran lavil. Me an realite, zot pa koumsa. Mo rann mwa kont ki tou seki nou trouve lor Tiktok, pa montre twa lavil Paris pou de vre ek so bann zenn ki an difikilte osi. Sa bann zenn-la si (Les Apprentis d’Auteuil) zot ena enn lavi konplike, parfwa zot viv lwin ek zot fami. Ler nou’nn koumans koz-koze, fer bann akitivite ansam, mo’nn konpran ki nou resanble zot plis ki seki mo ti panse. 

 

Apre sa mo’nn zwenn avek de dimounn ki’nn mark mwa: Marjorie ek Bruno. Se de responsab sa lasosiasion-la.

 

Marjorie li gran, so lapo blan, se enn dimounn ki ena karakter, li pa les personn mars lor li. O-depar mo pa ti krwar li pou vinn koz avek mwa. Me vremem li’nn vini. Li’nn ed mwa pou rekonsilie avek enn kamarad dan group avek ki mo ti gagn lager. Se gras a Marjorie ki mo’nn reysi met mo lorgey de kote. Mo’nn ouver mo leker ar li parski li ti dous, kalm ek a lekout. Li’nn montre mwa foto so garson ek li’nn koz so mama ek mwa. Li’nn dir mwa li anvi retourn Moris pou pas vakans. Mo ti a bien kontan retrouv li enn zour. Moman ki nou finn pase ansam, inn fer mwa gagn linpresion resevwar enn lamour maternel. Mo kone seki mo pou dir pou sok dimounn me premie fwa ki mo resanti enn lemosion koumsa.

 

Bruno, limem pli kosto dan group-la, li black. Li res ankouraz mwa pandan bann aktivite. Mo ti touzour gard enn freyer vizavi bann zom an zeneral akoz bann kitzoz orib ki zot inn fer mwa, me mo pa ti resanti okenn laper kan mo ti avek Bruno. Okontrer, kan mo ti avek li ek Marjorie, mo ti pe santi mwa an sekirite. Bruno ti koumadir enn deziem papa. Se limem ki’nn donn mwa sa ti-nom la: Chacha. An mem tan se gras a li ki mo’nn gagn kouraz pou fer bann aktivite balanse lor pie. Zame mo ti pou krwar mo ti pou kapav grinpe ek fer tirolyenn. Selman Bruno ti lamem pou ankouraz mwa. Mo finn lans mwa ek vremem ti extra top !

 

Gras a zot de, mo’nn kone ki savedir gagn latansion. Zis enn bonzour, enn kalin, demande sipa to bien… paret enn zafer bet me pou mwa li ti bokou. Okenn adilt dan mo lantouraz zame inn demann mwa sa.

 

Apre sa mo’nn al Paris. Ale lamem ti paret inkrwayab. Ler nou’nn arive, mo ti per bann-la pa la. Me o-final Bruno ek Marjorie inn vinn sers nou laeropor. Marjorie inn res may momem. Depi sa zour-la mo’nn gagn linpresion mo’nn gagn enn lot mama ek enn lot papa. 

 

Dernie zour laba, dan fwaye kot bann Apprentis d’Auteuil, zot inn donn mwa enn sertifika: « la plus souriante ». Mo ti santi mwa fier parski premie fwa kikenn trouv kitzoz pozitif avek mwa. Bruno ek Marjorie inn ofer mwa enn bizou an kado kouma enn sirpriz. Sa finn tous mwa. 

 

Tou sa lavantir-la finn ed mwa pou gagn konfians dan momem. Gras a Caritas ki finn organiz sa esanz-la, mo finn viv kitzoz intans, mo’nn gagn enn papa ek enn deziem mama. E a traver zot mo realize  ki tou posib dan lavi.

 

Chacha, 16 z-an