Retourn lekol faire mwa reviv

Pandan trwa z-an, Nigel pa’nn al lekol. Ler li ti ena 11 z-an, li finn bizin al travay. Lemond travay li pa fasil, parfwa li brital. Se, par azar, a traver enn program esanz avek lasiosiasion  franse Les Apprentis d’Auteuil, ki li’nn retourn kolez. Azordi li extra kontan ek li pe mem trouv pli divan pou so lavenir.

 

Depi de trwa mwa mo al kolez Fatima dan Trou aux Biches. Mo mari kontan. Sa lane lamem ki mo finn retourn lekol. Si mo’nn kapav rekonekte avek lekol, se gras a bann edikater Franse ki mo finn zwenn dan program esanz ant Caritas Solitude ek Les Apprentis d’Auteuil ki trouv dan Paris. Mo fier mo’nn kapav retourne. Pou mwa, li mari inportan parski se gras a sa ki mo kapav fer enn vizion mo lavenir.Ki savedir enn lavenir? Gagn enn travay, enn lavi normal, ena enn bann bon kamarad, fer bann aktivite serye ek sirtou ena enn lakaz. Tou sa bann kitzoz-la pa ti dan mo porte pandan plizir banane. Mo ti dan enn lemond kot zanfan pa ti sipoze ete me an mem tan pa ti gagn letan asize reflesi. Mo’nn abit plizir landrwa ek enn ta lakaz. La, mo res kot enn matant dan Solitude. An-fet mo’nn konn Caritas a traver mo mama ki ti pi vinn travay dan zardin isi; parey kouma plizir madam.

 

Laz 11 z-an, mo’nn bizin aret lekol. Mo ti fek fini lekol primer dan Solitude. Laplipar mo bann kamarad inn al kolez. Mwa mo’nn koumans travay. Mo pa kapav explike pou ki rezon exakteman sa finn deroul koumsa. Li pa fasil pou mwa pou rakont sa. Zis bann dimounn dan Caritas ki kone. Mo pa anvi rakont sa bann dimounn an-deor.

 

Sa lepok la mo ti res Bois-Marchand kot enn boug ki’nn fini desede zordi. Pa mwa ki ti swazir mo travay. Se boug-la ki ti pe dir mwa ki pou fer ek se limem ki’nn dir mwa aret lekol pou al koup dibwa.

 

Tou lezour enn kamion ti pe pase sis z-er gramatin. Lete kouma liver, roule mem. Mo ti mont lor kamion. Ti ena sink dimounn an tou. Mo tousel zanfan parmi. Me mo pa ti gagn per. Nou ti pe al partou dan lil, dan lafore, lor terin abandone pou koup dibwa. Lerla patron-la ti revande. Travay-la ti extra dir. Mo ti trouv bann adilt-la pares. Mo ti pe travay plis ki zot. Aswar mo ti mari fatige ek ti bizin rekoumanse le landemin gramatin. Tou lezour ti parey. Lafin lasemenn mo ti pe gagn lapey Rs 2500. Patron-la ti pe pey mwa cash akoz mo pa ti ena kont labank. Ar kas-la mo ti pe aste manze. 

 

Enn zour an Zilie 2024, enn mo bann kouzin inn vinn dir mwa Caritas Solitude pe fer enn program pou al kanpe. Li’nn demann mwa sipa mo ti interese pou ale. Se koumsa mem ki mo’nn zwenn sa group-la. Mo ti panse ti pou bom. Me mo pa ti ena rol mem, mo’nn ale. An realite mo’nn dekouver enn ta kitzoz: premie dabor enn bann landrwa dan mo prop pei ek mo’nn fer nouvo kamarad. Lerla ki mo’nn al konn group Franse ki’nn vinn Moris dan kad enn esanz kiltirel. Mo pa ti kone ki se bann zenn ki dan lasosiasion Les Apprentis d’Auteuil. Mo mem pa ti kone ki laba dan Lafrans ti ena bann zenn ki viv bann zafer difisil parey kouma nou. Zot riye, zot koze, me zot osi zot ena zot blesir.

 

 

Parmi bann edikater ki ti akonpagn bann zenn-la, enn madam, inn vinn koz avek mwa. Li ti apel Shirin. Li ti mari zanti avek mwa. Mo’nn rakont li inpe mo lavi. Shirin, se limem ki’nn demann Caritas ed mwa pou retourn lekol. Lerla zot inn fer tou zot posib pou ki sa realize. Mwa, personelman mo pa ti tro krwar. 

 

E pourtan, en Zanvie 2025 mo’nn reysi rant kolez Fatima ki trouv dan lenor Moris. Premie zour mo’nn poz mo lipie dan lekol mo ti mari kontan, mo’nn rekoumans aprann lir ek aprann enn metie. Enn mari lasans mo’nn gagne. Ek aster-la mo ena enn lobzektif. Mo panse mo pou travay dan lotel plitar: swa kote bar swa dan lakwizinn. Si mo pa ti zwenn avek Shirin ek Les Apprentis d’Auteuil, kitfwa zordi mo ti pou ankor pe koup dibwa. Mo’nn perdi extra boukou pandan trwa z-an ki mo pa finn al lekol. Mo mari tris me mo’nn gagn lasans pou ratrap mo retar. Shirin ti extra kontan ler Caritas ti anons li lanouvel. 

 

Mo kapav zwe footbal tou aster. Se mo pasion. Mo rev, enn zour vinn enn gran zwer fooball. Akoz samem mo’nn inskrir mwa dan club de foot dan Mapou. Club-la apel Fire City. Mo al lantrennman de fwa par semenn. Aster-la mo kapav dir mo resanble bann zanfan mo laz mem si lavi res konplike. Parey kouma bann zenn dan lasosiasion Les Apprentis d’Auteuil mo kapav koze, riye me mo gard mo problem pou mwa. An tou ka, mo’nn viv enn lot rev gras a zot. Zame mo ti panse enn zour mo ti pou pran avion, al Paris, get Latour Eiffel, vizit Sato Versailles ek mars-marse dan bann gran magazin. 

 

Mo ena enn ta kitzoz pou rakont mo bann kamarad kolez!

 

Nigel, 15 z-an