Depi vilaz Solitude ziska Latour Eiffel

Yoan, 15 z-an, viv dan enn kartie popiler dan Moris, kot lavi pa toultan fasil. A traver program esanz kiltirel avek lasosiasion Les apprentis d’Auteuil, li’nn reysi vwayaze pou premie fwa. Li’inn realiz so rev: trouv ek mont lor Latour Eiffel. Depi sa, so rev inn grandi: li anvi travay enn zour dan « la ville Lumière ».

Depi mo ti tipti, mo ti ena zis enn sel rev : trouv Latour Eiffel. Mo ti kapav get li zis lor mo telefonn, TikTok, bann fim… Me zame mo ti panse enn zour mo pou trouv li an vre. Pli extra : mo finn kapav mont lor li.

Kan mo finn met lipie dan Paris, mo ti koumadir dan enn fim. Mo leker ti pe bat vit-vit. Kan mo finn mont lao, mo ti pe get lavil anba mo lipie, mo gagn pa krwar mo ti la. Nou finn fer boukou aktivite. Seki mo finn plis apresie, seki bann zenn Franse ki nou finn zwenn, zot pa ti diferan ar nou. Zot kontan badine, riye, zwe, me kan bizin serye, zot serye. Finalman, nou parey. O koumansman mo ti kwar mo pa pou gagn kamarad, me depi zot finn arive, nou finn ed zot sarie zot bann valiz. Sa finn ed nou pou rant kamarad. Bien vit, nou ti koumadir konn nou depi lontan. Enn parmi bann zenn finn mark mwa plis : li apel Don Cato, li enn Aysien ki ena 19 an. Li ena enn frer apepre mo laz. Se li ki finn vinn koz ar mwa premie. Li finn rakont mwa kouma li’nn bizin kit so pei akoz lager, vinn viv Lafrrans dan enn fami. So mama inn res laba. Li finn mem fer nou zwe enn match football. Mo finn trouv li ouver, koumadir enn gran frer. Li osi finn dir mwa ki Paris pa toultan trankil. Ena landrwa kouma Saint-Denis ki kapav danzere. Mo’nn gagn sok, parski dan mo latet, Paris ti zis enn lavil trankil ek zoli. An vre, lavil-la bien gran, ena boukou tapaz, enn ta dimoun partou. Nou finn al dan bann gran sant komersial, finn trouv Arc de Triomphe… Partou ti ena mouvman. Enn ta loto, moto… zot ti tro for ! Pa ti exakteman kouma mo ti imazine, me mo pa ti dezapwente. Okontrer, sa vwayaz-la inn donn mwa ankor plis lanvi retourne. Pa zis kouma enn touris : mo anvi viv dan Paris, gagn enn travay, kapav dan enn lotel. Mo pare pou travay dir pou sa. Pou mwa, sa lexperyans-la pa zis enn dekouvert. Li koumadir enn deklik. Mo sorti dan enn milie kot lavi pa toultan fasil, me sa vwayaz-la finn montre mwa ki nou kapav rev pli gran. Latour Eiffel pou mwa pa zis enn moniman. Kan mo get li, li fer mwa rapel ki mo osi, mo kapav mont pli lao. 

Yoan, 15 z-an