19 banane soufrans

Moorgane, enn zenn fam 21 an, rakont martir ki li ek so fami finn viv : diznef an bat, zoure, viv dan lakrint. So lavi ti ranpli ar douler ek soufrans, sou lanpriz enn papa violan ek alkolik. Kontreman ar boukou zenn, li finn viv separasion so paran kouma enn delivrans. So bann mo for rezon kouma enn lavwa kont silans.

 

Mo ti lakaz ti trouv dan Rivier du Rempart, enn ti lakaz tol, trwa pies – salon ki inklir mo lasam, lasam mo bann paran, lakwizinn-twalet ek sal-de-bin deor. Nou ti a kat ziska ki karya vinn sinkiem mamb lafami, detrir nou bann meb dibwa. Me lamizer zamin ti enn problem tant ki lamour mama ek papa ti la, enn kado konble.

 

Sa ti ziska ki lalkol in vinn deziem madam mo papa, loder for kouma mo leve gramatin, balanse, tonbe, kraz latab, ziska mem in amenn li al dormi lor mo laptop. Tousala in fer mwa dekouver mo premie freyer.

 

Samem so dite dan gramatin, so ti kafe lapremidi ek so resours. Sa inn vinn enn routin ki finn amenn li ale ziska bwar lalkol ble. Kouma sa ki mo deziem freyer, parski mwa finn dekouver ki souvan li al deor ek kan mo rod lalkol pou souy mo vit ti nepli ena nanie. Mo pense ki sa loder la mem inn evey mo maladi asmatik.

 

Pourtan mo papa ti enn ti polisie bien travayer, mo pense. Li ti perdi so job akoz bwar dan so ler travay – samem premie debousolman dan lakaz. Anplis, sa ti enn rezon pou li vinn pli pir. Monn bizin aret lekol dan Form 5 pou koumans travay. Me touletan mo kas ti pe perdi, vesel oussi perdi ek nou dignite anvole are sa. Apre? Violans verbal pran so plas. Parol frekan ki mo mama ti pe gagne se « to enn iletre, to enn salte, to bwar Zanax parski to an faz depresyon extrem ». Ek mwa se « to pou fini kouma to mama san ledikasion, to enn p…, to enn divolter ».

 

Toulezour enn diskisyon ti vinn enn eskiz pou lev lame : « manze-la inpe trop fad! » Ou byen mama dir papa : « Pena kas dan lakaz, det pe akimile, kouran pou koupe ».

 

Se mo mama ki ti bizin sibir bann konsekans. La koler dan lizie mo papa ti montre enn destriksion irezistib avan mem li koumanse are nou. Nou konn tou : gagne kout kokiyaz, boutey rom, kouvertir tempo, li avoy linz deor. Li fer tou seki kapav fer nou dimal : riss nou seve ziska nepli kapav respire, gagne bat ziska nepli santi nanie, kriye ziska nepli ena lavwa ek plore ziska nepli ena larm. Mo kapav dire ki soufrans ti vinn enn labitid. Mo travay ti zis ser deryer. Monn fini kouma mama avek mark ble lor ledo ek mo ti ser avek labous brile.

 

Mo ti anvi sorti ladan, me sel kestion se kot pou ale. Ek de tout fason mama ti pe reste akoz nou, so bann zanfan. Enn gran zour mo mama in pran so kouraz al stasyon lapolis. Me enn bout papie kouma Form 58 pa ti so solision. Nou ti touzour dan pinse.

 

Enn zour mo papa pann retourn lakaz. Nou finn res 4 mwa san nouvel. Etranz pou dir, me lalimier, sourir, lazwa ek sirtou lape finn retrouv so plas dan nou lavi ek nou mantal. Apre enn lepok, mama ek papa inn separe, nou gagn enn rekonfor lespri. Nou kit ti lakaz tol pou al Pamplemousses, mo mama rankont mo boper. Li ti diferan de mo papa. Lerla monn konn mo premie lakaz beton, sak blok poze ti enn mervey. Premie gramatin leve san plore, san tann : « Moorgane, to papa pe tap mwa » ouswa « Moorgane, mo nepli kapav reziste! ». Nepli bizin leve dezer gramatin pou sonn lapolis. Mo ti demann mwa : eski mo pe reve? Eski se sa enn lavi normal? 19 an mo lavi, monn sirviv ek la, premie fwa mo resanti enn santiman diferan parski mo pe viv ek lakonsians kler.

 

Tousala fer mwa dir ki paran ki separe se pa touletan enn move kitsoz. Pou mwa li ti enn zafer positif, enn reper pou avanse ek enn troma tigit-tigit pe efase. Tank to pa sorti, to pa pou kone si ena enn pli zoli fitir devan : ek mwa monn fini erez.

 

Moorgane, 21 an