Eski Moris meyer ki Rodrig ?

Boukou zenn dan Rodrig panse ki Moris se meyer landrwa pou reisi. Annalisa pa dakor ar sa fason panse-la. Atraver lexsperyans so frer, Clarel, ki finn seye, linn trouve li pa osi fasil. Pou li, Rodrig res so zil, me li pa sir si so rev vinn avokat pou kapav realize si li res laba.

Mwa, mo kontan mo zil Rodrig. Tou trankil, partou zoli ek nou pa bizin boukou kitzoz pou nou viv ere. Isi, bann zanfan ankor zwe lamarel, domino ouswa mem dan labou. Mo zwe favori, se galoupe dan labou. Nou met bann kamarad dan brouet apre nou galoupe dan labou nou sarye zot. Se bann zafer koumsa ki kontribie rann nou lavi lor mo zil inik.

Souvan, mo frer Clarel ti pe koz al res Moris. Me toul’tan nounn panse li ti pe badine. Selman enn zour linn montre nou so biye avion ek linn anons nou so depar pou dan de semenn. Ler linn anons nou sa nouvel-la, nou ti pe manze. Sann koup net mo lapeti ek monn koumans plore.

Clarel, li tou sof enn Sin. Tou dimounn dan vilaz kone li enn manter ek li kontan lager. Me malgre sa, li ti enn model pou mwa. Kan mo ti tipti mo ti anvi vinn kouma li. Me amezir mo grandi mo koumans trouv so bann defo: li kontan fime, bwar, araze pou nanye ek zoure enn lazourne. Mem mo pa kontan so manier, linn toul’tan protez mwa ek mo ser. Li ti pe res dir nou ki dan Rodrig pena lavenir.

Bien sir mank boukou kitzoz. Mwa, mo rev se vinn enn avokat. Me isi, pena liniversite ek pena mwayen pou avanse. E si arive to gagn bann problem kouma divors, pena personn pou ed twa. Kitfwa mo pou bizin ale akoz sa. Me pou le moman, mo bien kontan mo dan Rodrig.

Zour Clarel inn ale, mo leker ti an miet. Ek limem avan li ale, linn plore. Nou tou inn plore. Sa ti enn moman boulversan pou lafami Edouard. Nou ti konsian ki li pa pou retourne. Sa swa ki linn fer, ti definitif: isi, pena mem travay pou bann zenn kouma li.

Depi so depar, fer plis ki de z-an, li sonn nou tou leswar. Li rakont nou so bann difikilte ek so kotidien. Odepar, li ti pe travay kouma server dan Moris. Me linn kit travay-la akoz linn gagn problem. Asterla, li fer livrezon marsandiz antie lil. Li avek enn kopinn depi de trwa tan; li santi li mwin tousel. Mo fier pou li, me mo kone se pa sa lavi-la ki li ti reve. Mwa, mo anvi fer pli bien. Mo le resi ek fer lafierte mo fami.

Boukou zenn kit Rodrig pou al Moris ouswa lezot pei. Zot panse lot plas pli bon. Me ler mo tann zot rakont mwa zot bann difikilte – ladrog, stres, ti-boulo – mo mazinn tou seki zot inn les par derier. Rodrig, li kapav pa sa gran la, me li res nou zil. Mwa, mo le res isi, avek mo fami ek mo bann rasinn. Me mo lil pa donn mwa boukou loportinite. Mo pa interese pou vinn peser, agrikiltris, ouswa foksioner. Ler fer linvanter, ki reste dan mo zil?

Annalisa, 16 ans